老媽情緒勒索嘅時候 「你知唔知阿媽生你出嚟湊大你好辛苦」 我當然知道辛苦 但我覺得決定生仔係你心甘情願嘅選擇 同埋生之前應該有衡量過自己嘅能力/體力/財力 覺得好辛苦就要怪個小朋友？ 就算想小朋友有感恩/孝順之心都唔使咁講嘢 母慈，自然有子孝 「我係你阿媽嚟㗎」 有時有啲嘢傾唔掂數都會一句撻埋嚟，冇彎轉 所以阿媽一定是對的？ 做仔女就完全冇資格發表意見？ 咁你又問我做乜嘢？ 而家我學精咗，邊個出錢就邊個話事 唔使再問人意見，唔使煩 「我都未問返你攞錢」 老媽係典型養兒防老嘅老派思想人 佢喺職場上只係打滾咗十年就退出 因為體力勞動工作，新傷舊患，佢聲稱再做唔到嘢 但佢嘅積蓄係少到冇得再少（根本生活都成問題） 當然我唔係要怪佢 始終佢有養大我，我照顧返佢嘅生活都係應該 但老媽成日有個錯誤嘅觀念呢個係佢應得嘅回報 因為佢養大我有付出過，而家就要「攞返」啲錢 所以仔女係佢嘅投資工具？？ 好坦白講，佢用幾多成本養大我我有眼睇 我亦都唔想喺呢度數晒出嚟咁難睇 要講回報嘅話，呢十幾年都真係俾突晒有餘 一家人係咪真係要計到咁難睇？ 親情係假嘅？得銀紙先係真