《關於我在北極養雪橇狗的這件事 - 1》 趁仲記得，記錄一下年少輕狂嘅往事。 當年我25歲，某啲原因要離開香港喺加拿大留幾個月。呢段時間唔長唔短，搵份工又唔係，就咁hea過又好似好浪費。 「不如搞啲癲啲嘅嘢？」呢個諗法突然間喺我個腦度閃過。 加拿大有乜出名？凍囉。 我打開Google Map，嘩，原來加拿大有好大部分都係喺北極圈入面！好！一於去北極！嗰陣後生，覺得呢件事勁型，型最緊要。 當時出嚟做嘢冇耐，冇乜錢，雖然唔知要洗幾錢，但係肯定唔係平。短短去幾日我可能仲比得起，但係住幾個月呢？同埋齋住好似冇咩意義，果度有咩做呢？ 我諗諗下諗起成日聽人講去澳洲working holiday摘士多啤梨，決定用呢個方向google。排除啲唔關事但係都好鬼吸引嘅結果，例如去東南亞照顧大笨象、去加勒比海養魔鬼魚、去南非保育企鵝等等⋯真係比我搵到個網話去北極養雪橇狗。Yes！係你喇！ 申請費用冇記錯係1000USD⋯係呀，做義工仲要課金，但係考慮到係要去北極，覺得接受到，個網站睇落又唔似假，好快我就俾咗錢。（雖然我之後發現做咗水魚，遲啲再講） （待續）