(續1) 直到比賽早上，頭痛乏力嘅感覺退卻。朝早依然寒冷，只有兩度。波士頓起步需要係終點寄存行李再搭巴士到Hopkinton 起點。大意嘅我將原本用以捐贈嘅衞衣留係酒店。寄存行李後只著住比賽背心係巿中心等一個鐘巴士。期間有個好心跑友比左個黑色大膠袋比我擋風。去到起步點，依然係等待。一直搵有陽光嘅地方嘗試保暖。由寄存行李到起步，足足四小時嘅催殘。 差唔多十點鐘，慢慢走到起跑線，大約一公里路程，陽光開始照耀非常美國風情嘅Hopkinton小鎮，跑者都做好最後準備。氣溫上升到八度非常適合跑步。作為愛國者日嘅比賽，大會先係奏起美國國歌，再有軍機衝場儀式，非常大美國主義。不過正正呼喚番我熱血嘅內心。經過熱身手腳已經唔再冰冷，團火亦都衝出殘破嘅身體，意志亦都變得堅定。 比賽前，我對成績冇太大顧慮，只要PB就可以。一起步，身體有d僵硬，順勢而行！頭半程都係落斜，一直以3分50秒步速推進。眼下已經見唔到沿路嘅事物，乜野衛斯理女子學院，尖叫隧道，心碎坡，當時我完全見唔到依一切。不過，我依然享受住波士頓馬拉松。我享受我嘅光芒係依段比賽路上發亮。即使完成全部六大馬，依然覺得波士頓當日嘅比賽係最令人享受。

(續2) 經歷後半部份rolling 坡路折磨，步速係最後十公里已經跌到3分55至4分。陽光照住波士頓巿中心，廣闊康莊嘅大道迎接勇士回歸，我終於聽到支持者喝采聲，再比多一d力，push to the end。 到啦！跑者最高殿堂嘅終點，我人生最輝煌時刻到啦！2小時44分56秒！無預期之下走入sub245。幾年嘅努力終於得到超乎想像嘅回報。係自己心目中嘅聖殿得到最大嘉冕！所有努力得到回報，更因為依度係波士頓，我得到嘅係無上榮耀。

睇到濕左😢