斷指之後連環黑仔事件 - 4 終於等到第4日，姑娘話我可以入手術室。 之前網上有個孤獨指數表，最高級係自己一個去做手術，我瞓喺床上望住醫院天花版嘅白光燈心諗，乜做手術唔係都只可以一個人？ 麻醉科醫生幫我做半身麻醉，仲畀啲瞓覺藥我聞，數到三我就冇咗知覺。 由於手術床係鋼板床（好似係），又凍又硬，手術做到一半我突然凍醒咗，我擘大眼望住醫生，好虛弱咁話「好凍….」 姑娘見到我醒咗好似撞鬼咁，即刻畀返個瞓覺藥我聞，之後我醒返手術終於做完，一做原來做咁8個鐘。 我醒返之後，幫我做手術嘅醫生竟然同我講：「我姓x，我之後會轉私家醫院，記住我！」 我心諗咁樣都得？不過做完手術個人好溫燉，淨係想快啲出院。 做完個手術瞓咗晚，第二朝就要出院，醫生巡房叫我打住石膏嘅右手兩星期後去做物理治療同職業治療，叫我出院去卜。 如是者，經過超過72小時不吃不渴，我出院嘅時候瘦咗14磅，人生都未試過減磅減得咁快。但再之後複診，先發現個醫生已經犯咗無可挽回嘅錯🥹