前晚一點上飛機，未起飛就已經瞓著咗，一直到降落先識醒。但老公就無咁好彩喇，落機後我覺得好凍，好彩老公準備咗件褸畀我。 放低行李後，我哋去搵嘢食，但係咁早好多鋪頭未開😂，就周圍行，原本想去黑門市場食，但一個丼要4000円，老公即刻拉走個頭寫住「水魚」嘅我，離開黑門市場去到下一條街。果度我哋一人一個三文魚親子丼，加埋都係2000円有找，平好多，又好食！ 夜晚，老公帶我去食和牛烤肉，我一向覺得和牛太油，但琴晚食嘅真係好好味，唔膩之餘入口即化，真係太正喇！仲有用液態氮整嘅甜品，口感特別，又有表演睇，食物又好味，我地重飲左山崎添。 食完之後，我哋去夾公仔，夾到最鍾意嘅兔兔，好開心咁返酒店啦( ´▽` )ﾉ