當年仲用緊PPS追片，而PPS啲片就成日時有時無。我幫佢播完第一次，到第二日佢又叫我播。我嫌麻煩就拒絶佢，話唔想幫佢播。佢話俾$100我，叫我幫佢播，所以我就收佢$100，然後幫佢係PPS到搵片，但搵極都搵唔到，我就同佢講：可能條片下咗架，冇得播。然後佢發好大脾氣，死都唔信，話係我唔想幫佢播，想呃佢$100。我話：咁我俾返$100你囉，然後俾返佢。最後嘈嘈吓交，佢又攞把菜刀岀嚟話要斬我。然後我嚇到衝入房關門報警！佢一聽到我報咗警，佢就收埋把刀，然後情緒勒索我，叫我同警察講：冇事，佢冇攞菜刀。佢話如果我講真話，我就要入兒童之家做孤兒。當警察上到嚟問發生乜事，佢就扮好人，話佢好𡃶我，係我青春期反叛之類。最後我冇話佢攞刀，只話佢因為呢件事打我，而警察就收咗隊。