自少爸媽都係教我，要大方唔記仇，嬲人哋之前要諗吓係咪自己有錯先，係咪自己太小氣，係咪太執著？ 所以，無論讀書時或出嚟做野，我總係會跟大隊，唔希望做出啲令其他人唔鍾意自己嘅事。於是慢慢我已經忘記，原來我係可以揀，揀同事、揀朋友。 直至有一年，有一個女仔同我講「你無可能要全世界都鍾意自己」，我個腦先叮一聲，開始思考自己「點解明知對方係搵笨或暗地裏希望我過得唔好，但我依然要繼續笑面迎人呢？」；如果係老闆，為份糧我都明，但如果係一個對自己毫無價值嘅親戚，我繼續扮大方係為咩？ 然後，我就開始做番自己，避開「等睇我唔好」嘅人，更加珍惜對自己好嘅人，做一個好唔圓滑嘅人。 今日，媽咪又再講起「做人唔好太屈，就算幾唔啱都好，見到面，應該要打招呼，呢種係禮貌！」 我忍唔到爆咗一堆內心話，因為我係真心覺得而家擁有嘅朋友好好，數量唔多，但真心！同佢哋相處係樂事； 而會傷害自己又或笑住等你仆街嘅人，其實我真係連招呼都唔想打，因為呢種違心嘅禮貌笑容，我唔想再做，因為唔需要。 我媽咪認為嘅大方，喺我眼中係天真，所謂嘅好來好去，係無價值嘅委屈。 #同阿媽夾唔埋系列 好來好去呢句話真係唔係人人適用