斷指之後連環黑仔事件 - 2 （黑心留言即block) 醫生語音未落，我老母終於珊珊來遲趕到。 20萬對於學生嚟講係天文數字，我用求救嘅眼神望住我老母🥹，佢臉色一沉話要打個電話先。 隔咗陣，我老母一臉歉意咁話：「Sorry，保險agent話賠到最多3成，我冇咁多錢醫你…」 我嘗試冷靜：「咁有咩辦法呀？」 老母：「Agent話可以叫私家醫生寫封轉介信去公立，睇下可唔可以快啲見到醫生。」 輾轉咗一輪，最後又要返公立，不過今次拎住張盛惠$3000嘅轉介信，好快就見到醫生。 醫生：「可以安排你入院做手術，不過手術室好full，同埋你嘅情況要駁返啲筋腱同神經，個手術需時都長，你由而家開始唔好飲水同食嘢，我哋手術室有位就會幫你做手術！」 我：「之前你哋分流個護士話我聯返針就得呀，話我冇筋腱喎！😒」 醫生：「急症室咁忙，個姑娘睇唔清楚啫，你出返去等入院啦！」 雖然成功入到院，但頭一晚都係要瞓走廊，因為骨科冇晒房！如是者，我絕食咗72小時都未入到手術室。