琴晚講起坐車，講埋落去先。 屋企為婆婆安排嘅葬禮就喺她離開嘅第四日舉行，隆重其事，大家都會以黑白色為主精心打扮，以示對先人嘅尊敬。 淨係帶咗一套黑裙但無帶黑鞋的我，喺招呼完客人食lunch之後，見得閒又有時間，就決定出去買鞋，舅父知道就話開車車我同媽咪出去。 上到車無耐，就覺得車上面有陣味，呢陣味唔係啲咩臭味又唔係啲咩香味，而係同我每日喺醫院幫婆婆抹身嘅時候聞到嘅一樣。我唔肯定，但真係好似，可能係我聞錯都未定，始終架車之前有揸過去買餸，或者係啲餸菜嘅味道殘留咗喺架車度。 買完鞋之後喺附近行下先上車，一路行我就一路諗喺車到底係咩事。忍唔住問媽咪喺車有無聞到啲咩，佢話無喎。我就講返俾佢知我聞到啲咩。 唔識聽中文嘅舅父問咩事，就喺媽咪用泰文同舅父講返嘅時候，我哋三個人都一齊聞到一陣香燭味，媽咪望一望周圍，都唔見有人點香。 後尾媽咪同我講返，泰國人相信聞到香燭味，係代表先人喺度。 可能婆婆嗰日仲未真係離開，佢仲喺我哋身邊。 呢次應該先係我認知中，最後一次同婆婆一齊坐車。 P.S. 婆婆好真係好鬼死cute，知道我哋出去買嘢特登同我哋一齊去shopping，果然係貪靚嘅婆婆。