誠 02 其實搭校車都算係個social嘅機會，有個到而家識咗十幾年嘅老best就係搭校車識。五年班嗰時老豆死咗，我同老母就搬咗屋。之後轉咗搭另一班校車。 新校車有兩個小霸王，叫阿熹同阿彤，佢哋六年級。好死唔死，我仲要被安排坐佢地隔離。開頭我粒聲唔出，佢哋見我咁鵪鶉就係咁撩我講嘢又整蠱吓我咁。慢慢我哋變到成日鬥嘴，日日都由上車嘈到落車。 咁啱嗰時班上面有兩個男仔鐘意我，放親小息都圍住我轉。佢哋成日都嘈交嘈到話要隻抽，勁能好笑。有日喺操場放小息，我同啲fd企喺到食嗰兩條友花生。 點知阿熹無啦啦帶住阿彤同埋幾個我未見過嘅男仔走埋嚟。唔知佢做乜勁，無端端好惡咁推我班嗰兩個男仔，又笑佢哋係廢柴。我突然燥咗，好大聲喝佢唔好恰我啲同學。見到我好似真嬲，佢就好掃興咁帶埋班fd走咗。 本來件事都無太擺喺心，直到阿誠話今日好似喺學校見到我？ 屌，佢哋都係六年班，唔通佢就係跟住阿熹嘅其中一個fd。咁我頭先發癲鬧人佢咪睇到哂⋯⋯ 「唔會掛？你讀邊班？」 「6E。」 唉，真係同阿熹同班，睇嚟頭先佢真係在場。 但除咗尷尬，仲覺得有啲可惜。點解阿誠明明頭先就喺面前，我都無留意到佢。