《關於我在北極養雪橇狗的這件事 - 4》 我班機喺Yellowknife起飛，一路向北飛咗兩個鐘，中途喺個叫Norman Wells嘅地方停咗陣上落客（冇諗過咁偏僻嘅地方都有人住）。 飛機再次起飛，好快就到咗今次嘅目的地——北極圈以北200公里嘅Inuvik。 一落機，周圍真係咩都冇，得個好細嘅客運大樓。行到入面又見到隻北極熊標本，睇嚟係極地機場嘅特色。 攞完行李，發現冇人舉牌接我。坐低等咗陣，諗諗下唔對路，即刻check返個email，想揾下個Contact。X！個agent冇比到養狗負責人（下稱我老細）嘅contact我。加上我唔記得申請手機plan冇得打電話，個機場Wi-Fi又壞咗，唔知點算好，完全冇諗過呢個情況出現。 喺徬徨之際，我喺機場入面睇到塊貼滿唔同嘅廣告嘅告示板，而喺上面搵到我老細嘅號碼！但係我手頭上冇電話，唯有問機場職員借咗個公共電話比我打過去。 冇人聽。 打咗幾次都冇人聽。 我呆咗，用咗24個鐘先啱啱嚟到個起點，點知呢趟旅程未開始已經結束⋯ （待續）