（二十二） 順興茶檔 一歲多時從九龍遷入大坑浣紗花園，嗰幾年有單異常爆炸嘅新聞發生喺呢幢大廈，記得應該係銀行械劫案之後啲匪徒匿咗喺呢幢大廈其中一個單位，飛虎隊爆破圍剿追蹤捕獲所有匪徒，所以當時呢個單位喺藍白色外牆嘅時候佢係因為爆破變成另外一隻顏色。講返順興記得細個有經常去食，但係食得最多都係以前17、9歲果時，通常打天九到天光6點左右就揸車去茶檔食車仔腸粉，當時車仔檔係黐住個茶檔右手邊嘅，而嗰時剪車仔餸嗰把大鐵剪嘅撐撐撐聲先最正，咁早去因為有腸頭同螺頭同咖喱魷魚食，同埋基本上晏少少就冇腸粉，之後車仔檔入舖就冇咗果種風味喇，之後再馳名嘅滑蛋叉燒飯已經係後話。 https://www.singpao.com.hk/mobile/index.php?fi=news1&id=126014