返返去個換字。呢度慘在冇走盞位，點唱都係抝音。 可以想像到Wyman填呢句時嘅糾結。正常嚟講填詞人應該係幾憎抝音，盡可能都會想解決左佢。但首先應該冇其他３或５音嘅字適用喺嗰個位，如果唔係Wyman已經用左。 喺呢啲情況下，如果郁唔到一隻字，你只能夠擴大戰線，前後郁多幾隻字，睇吓可唔可以表達返相似意思。 睇返「可有換到十吋金」呢句，「十吋金」呢幾隻字冇可能郁，因為完全同上句緊密呼應，亦要靠佢嚟引典。 噉就得返「可有換到」呢度可以做手腳。但喺呢短短幾隻字入面，佢要回應上句嘅「獻出」，所以呢句點都要表達值唔值／等價交換嘅意思。另外佢亦要表達不能夠／無法嘅意思。所以喺度係有極多constraints。 如果唔想受呢啲野限制，就要再擴大戰線改埋上面嗰句。但比著我都會覺得唔值得。另外改上句都唔易，因為既然唔會改「十吋時和分」，噉郁動嘅空間同樣好細。 另外，「可有」其實喺度填得係幾恰當，因為佢一方面表達不能夠／無法嘅意思（對應成首歌嘅主題：時間無可替代），但又唔係說教式直接同你講唔得，而係叫你反思吓得唔得。因此你都未必想換走「可有」呢兩隻字。 喺冇辦法下保意思而棄啱音，係無奈嘅取捨嚟。