誠 （1） 小學雞嗰陣，為咗R啲Facebook game心心亂咁加人，誤打誤撞識到你。 雖然係同一間學校，但每日傾計我哋從來都無喺學校入面見過面。 你早我一年畢業，入咗間比較差嘅學校。我知道你係個好乖好靜嘅人，一路聽你傾訴一路偷偷擔心你會比人恰，識唔到朋友。 後來發現你間學校同我媽幫我揀定嘅第一志願好近，忍唔住幻想等我都升中學後，就可以著住另一套校服見面。 記得嗰一年嘅生日前夕，你同我講呢排成日都瞓唔著，因為有少少鐘意咗我（！？） 嗰時我唔識回應，因為我哋連見都未見過，淨係喺fb睇到大家嘅相。而好快呢一句鐘意就比你洗版式嘅生日快樂帶過咗。 後來我哋終於見面，仲要唔係單獨，比想像中要尷尬勁多倍。唔知係你怕羞定係我太樣衰嚇親你，你好似唔想太理我，淨係同個frd講嘢，勁bad trip 。 由嗰次開始我就變得唔自信，之後傾計嘅頻率都逐漸減少咗。我成日都諗，你見完我係咪後悔講過嗰句鐘意。 輪到我升中派位，收到結果就迫不及待返屋企pm話你知。嗰時我真係好開心，但你比我嘅回覆令我有啲失望。