誠 01 自從老豆死咗 老母好驚我情緒有問題 所以都唔再管得我咁嚴 搞掂功課補習呢啲基本野就由得我玩電腦 想當年 ig都未出 大家放學都係玩Facebook 而嗰時周圍add人都係件幾common嘅事 唔似而家 大部分人見到request都左諗右諗 不過總有例外 有日我少有地收到pm問 你係邊個？ 而問嘅人就係呢個故事嘅主角 阿誠 㩒入佢嘅profile睇 原來阿誠同我一間小學 係高我一年級嘅「師兄」 我哋好快就傾起上嚟 自然地成為每日都吹水嘅網友 你話我同阿誠喺學校有冇講過嘢呢？係無嘅 我哋仲一齊讀小學嘅時候 直頭連見都未見過 都幾神奇 就算日日傾計 都無諗過要喺學校搵佢出嚟 比著係讀緊中學或者u嘅時候 有個人日日同你傾計 正常都會搵機會喺學校碰個面 再食餐飯 會話嗰時真係好pure 純過蒸餾水(˶‾᷄ ⁻̫ ‾᷅˵) 直到有日放學 佢同我講 好似喺學校見到我 睇到呢個message後個心跳得好快 我開始對見面呢件事產生期待 㩒入佢profile 睇佢啲相嘅次數越嚟越頻密