（重蹈覆轍2） 因為我工作都算穩定、人工都唔錯，所以每個月就算要幫阿媽還錢，負擔都唔算好大。過咗一段時間，正當我以為情況有所好轉個陣，我阿媽開始經常唔返屋企，打極俾佢都唔聽。有一晚我阿爸同我講，我阿媽唔要得㗎啦，由得佢死係出面，我先知佢又繼續賭繼續借。 有日放工阿媽喊住咁打嚟，話阿爸要攞刀斬死佢，我叫佢去安全地方，佢話將自己鎖咗係廁所。我個刻好驚真係會出事，即刻通知細妹同截的士趕返屋企。但等咗好耐都無的士，我差啲忍唔住係條街喊，亦諗過報警搵警察上去先。趕到返屋企我見到嘅係廚房放刀嘅櫃打開晒，啲刀拎晒出嚟放係飯枱，我阿媽匿係廁所唔敢出嚟，而我阿爸就好似無事發生咁係房食煙玩手機。我拍門叫阿媽出嚟，佢喊住咁話唔敢，不停話阿爸真係會斬死佢。直至我細妹都返到嚟，我同佢勸咗阿媽好耐，佢先敢出返嚟。 我問阿爸到底咩事，佢只係不停話阿媽無用，死咗就算。我問佢有冇諗過斬死阿媽有咩後果，佢話坐監都無乜大不了。我問咁我同細妹點算，佢話我哋大晒理唔到咁多。個刻我一直壓抑嘅情緒終於爆煲，我叫佢不如斬死我先，反正我都唔想做人，佢話做錯嘅唔係我，所以唔會斬我。最後為免真係出事，我同細妹帶咗阿媽去阿嫲到過夜。