（重蹈覆轍3） 原來阿爸咁失控係因為阿媽成日賭錢唔返屋企，而且細問之下佢賭到供唔起原先啲數，問咗同事借錢，依家兩邊都催佢還。 其實呢個時候我已經因為大洗爭落卡數，不過每個月分期還都仲ok，但就無儲蓄同多餘嘅錢幫阿媽還錢。佢叫我幫埋佢呢一次，還清就唔會再賭，情急下我問屋企人同埋向財務公司借咗錢俾佢。因為借過錢就知，銀行係低息，但審批要等好耐，而財務公司又有app，撳幾下就申請到，但呢個係惡夢嘅開始。 係家庭、工作同感情種種嘅壓力之下，我開始控制唔到自己，有錢就揮霍。見到想要嘅嘢就買，想食嘅嘢就食，名牌又好，成千蚊一餐嘅飯都好，完全唔會考慮價錢，只係想享受金錢買返嚟嘅快樂。到用晒啲錢就碌卡，卡都碌爆就再借，如是者我已經爭落幾十萬。 當我發現每個月都差唔多要將成份人工拎嚟還錢嘅時候，我開始意識到問題、開始驚，好嘅係仲有銀行幫我做結餘轉戶，所以又可以稍稍鬆一口氣。但呢一口氣未完全鬆到，就發生更大嘅事，我發現阿媽一直以嚟都講緊大話。