（重蹈覆轍4） 阿媽有幾日完全無返過屋企，問佢係邊又唔講，只係話唔洗理佢，無人幫到佢。係我不停追問下，佢終於講佢係出面借咗好多錢，還唔起驚人追數所以唔敢返去。 原來佢一直無停止過賭錢，之前話還錢俾同事都係大話，只係想拎到錢去賭。而且佢無返屋企係因為係麻雀館輸錢無錢俾，要留低打工還錢（唔知真假，阿媽自己講）。諗返起個一排經常收到阿媽打嚟嘅電話，通常講一兩句就會收線，但以往佢基本上唔會主動打俾我，事實係佢去借錢要對諮詢人電話。 當佢拎晒啲財務公司卡片出嚟個一刻，我真係有心力交瘁嘅感覺。幾多張卡片就代表佢借咗幾多間，每一張都寫住借咗幾多錢、分幾多期，計埋有成十幾二十張，大約借咗3、40萬。我上網查過，呢啲都唔係咩正規公司，除咗月數、仲有咩半月數，即係要每兩星期就還一次錢。阿媽人工得萬幾蚊，每月出糧又點找得起，所以佢就不停借、不停數冚數，啲債好似滾雪球咁。 我無能力幫佢還到咁多錢，唯一辦法就係請嫲嫲幫手。由細到大嫲嫲都好錫我，雖然父母差，但嫲嫲都寵我到港孩咁。我叫阿媽向嫲嫲坦白，佢跪咗係嫲嫲面前，喊住咁話對佢唔住，求佢幫手。