（重蹈覆轍5） 阿媽跪低個一刻其實好震撼到我，因為賭佢乜尊嚴都無晒。之前講過嫲嫲其實唔鐘意我阿媽，所以個刻佢好嬲，仲踢咗我阿媽一腳，講晒粗口咁鬧佢。見到阿媽喊晒咁求人，我覺得好心酸，亦都好嬲，唔明白點解佢錯完一次又一次。自問已經好盡力，我經常提出一家人出去食飯、組織家庭活動，就係為咗阿媽唔好咁悶，感受到家庭溫暖，同時彌補我童年嘅缺失。點解佢睇唔到我嘅付出，點解佢做任何嘢都無考慮過個家，只係諗自己。我唔求父母為我做任何嘢，只係好好生活都做唔到。 之後我同嫲嫲傾，呢筆錢當係我借，但我心底都知咁係唔啱，亦好內疚嫲嫲咁大年紀仲要承受呢啲嘢。但爺爺嫲嫲最後都係決定唔幫阿媽，所以我都冇晒辦法，甚至想過放棄。咁辛苦生活不如死，死咗就可以解脫，而且我買咗份保險，死咗就有錢拎，佢就可以還錢。另一方面我好驚因為還唔起錢，阿媽會去做傻事，我寧願死個個係我。我感到好窒息，第一次打咗去啲戒賭熱線，睇吓有咩可以做。 呢段時間我好似行屍走肉咁，對所有嘢無晒希望同熱情，只係得苦惱同掙扎。亦因為咁，我開始踏上父母嘅舊路，慢慢沉淪。