誠 02 想喺學校見一面都唔係咁容易 因為小學雞連放小息都要分年級咁放 好多時我喺操場時 佢就喺課室 而一個普通學生想去其他年級嘅樓層都幾kick 嗰時真係勁後悔嫌麻煩無應承老師做風紀⋯ 唔知係好彩定唔好彩 搬屋換咗校車 識咗日日同我鬥嘴嘅死對頭 — 阿熹同阿彤 睇FB見到啲相 發現佢兩個竟然同阿誠同班 會唔會⋯我哋之間整定係有啲連繫？ 不過我都唔敢同阿熹佢哋提起阿誠 廢事佢哋亂講嘢 最後都無成功喺學校見到阿誠 佢就已經畢咗業 但我哋反而傾得越嚟越密 尤其喺佢升中嘅時候 因為成績唔好 所以佢派位就被碌咗去間幾差嘅學校 暑假佢返咗一兩日學 好快就同我呻識唔到人 我走去google 睇到啲人稱佢間學校做武館 就開始偷偷擔心佢喺入面會比人恰 不過同時我又發現 咦 佢間學校⋯⋯ 離老母好想我入嗰間中學好近 只係隔幾條馬路 嗰時我已經開始幻想 同阿誠嘅第一次見面 著住中學校服 可能係lunchtime 或者係放學 好似平時睇嘅愛情小說咁青澀浪漫 但現實永遠都唔會符合你嘅想像 我哋好快就見咗面 仲要勁能bad trip