（二十三） 翠華餐廳初代 （銅鑼灣謝斐道店） 點解一定要叫初代翠華？因為自由行之後開始變質，質素冇保持更每況愈下直至今天瓦解階段，但但係我會記得頭10年係非常之好食，係寧願比多少少錢食優質嘅茶餐廳食物。 佢以前一開舖嘅賣點，一係咖喱而第二係佢嘅鯊魚骨湯底，我哋以前每次十幾人飲完酒去打躉食宵夜，都會點魚皮餃墨丸河或麵，仲有個最正嘅「出色熱狗」，佢2000年附近香港經濟好差嘅時候推出過$1焗青口無限次叫，我哋成班醉酒佬可以食佢20碟，佢哋都冇黑面，咖哩牛腩堅，之後發現個凍咖啡非常之正不過飲完好鬼心跳。 當年呢個大舖逢過年都照開而門口會擺曬接枱俾客坐，好好氣氛所以加二都照去（當年好少餐廳過年開㗎）。 而家貳號冰室喺其中一位老闆開，之前係唔知嘅，係食佢個咖喱突然發覺有啲舊翠華嘅味道，所以上網Google先揭發係其中一個老闆開嘅，而呢個冰室個炸魚柳係非常之好食。