早幾日同個媽媽講起考學校，佢話佢個女已經中一，但係好後悔當年嘅決定: 佢當年有間B1較嚴嘅龍校vs另一間非龍happy school ，佢話唔想個女咁大壓力，所以揀咗後者。點知因為好happy加上學術要求唔高，嚟到呈分試，成績非常一般。最慘係個女身邊嘅「好朋友」已經開始對個女有不良影響之餘，仲提議個女一齊揀間band 3學校升中。受朋輩影響嘅女為咗要擺間band 3喺第一位，同個阿媽嘈到面紅耳赤。好彩阿媽最後勉強說服到佢填咗一間band 2學校。 雖然而家順利入到呢間band 2學校，但阿媽心裏面冇期望個女嚟緊DSE成績會好勁，佢只希望唔會再有啲「好朋友」影響佢個女、將來唔會帶MK仔返屋企、畢業後有一技之長，養到自己。 喺選學校嘅課題上面，每個家長有自己嘅諗法，亦都會因為小朋友嘅性格而改變。從來冇話咩學校先係好，不過希望每個家長都記得：喺佢小時候「你」選擇咗一條咩路俾佢，5年後嘅呈分試同12年DSE考成點你都唔好埋怨。無論你讀邊間學校、小朋友開唔開心、性格係點，入U考試嘅準則唔會因為呢啲嘢而改變。 戴個頭盔先：入U當然唔等於成功喇！做家長嘅你ok就得架啦！始終條路自己楝…..