長文慎入 今日我細佬同我講 細佬：👦🏻 我：👧🏽 👦🏻：家姐，前幾日有個隔籬班嘅學生讀書唔係幾好比老師鬧，仲要拉咗嚟咗我哋班房，後尾我哋班主任帶返佢去自己班房，之後我哋喺自己班房都聽到隔籬班房老師鬧佢 👧🏽：咁你覺得嗰個老師啱唔啱？ 👦🏻：我覺得唔係幾好，自從升咗上去四年級之後，所有老師都變得好惡，上次有個插班生，第二日冇交功課，比老師好惡咁樣鬧，但佢嗰一日係第二日返學咋 👧🏽：我都覺得個老師唔應該咁惡，成績差唔係罪，冇交功課係唔啱，但唔至於咁惡，仲要拉佢去其他班房，如果你遇到啲咁嘅事，一定要同家姐講，因為咁樣做係唔啱 因為以前小學體會過，所以唔想自己細佬再經歷。自從上到中學之後我先知道，原來學生係人，唔係畜生，細個因為改正冇跟足格式，俾老師撕爛晒成份功課，又因為交唔齊功課，上堂嗰陣老師將我成個書包D野倒晒出嚟，仲有好多林林總總，有啲嘢係要由細開始教，但唔係用呢個方式教。 小學六年級嘅時候，因為太驚返學，一返學就想嘔反胃，陸陸續續一直曠課。 可能有人會話呢啲係學生自己嘅問題，個老師只係有責任心，但七八歲嘅學生，都只係七八歲，用呢種咁嘅方式係唔係真係適合？