《一個80後的時裝冇血淚史1.22》 失咗「點解要買你」呢個賣點之後，商品喺市場上就只剩返兩個交易條件：衝動消費同價錢優勢。用呢兩種態度買嘢嘅客人好難維持到… 衝動消費唔會係長久嘅，而價錢競爭容易導致惡性競爭，令利潤空間受到嚴重影響。一旦陷入價格戰，品牌由於利潤影響開發發展同保持對市場潮流嘅敏感度，從而邁向單品化或失去方向而最終被市場淘汰。 我諗咗好耐點樣去解釋「品牌」嘅重要性。我覺得用Tesla去解釋呢件事大家會比較清楚。tesla係跟住佢嘅vision去進行開發同埋研究，所以形成先有「願景」後有市場，個情況同Apple好似;而當成個大陸開始瘋狂去出唔同嘅電車品牌、電車設計嘅時候，tesla已經玩緊點樣筷子夾火箭。你玩嘅市場係人哋已經玩剩㗎啦⋯⋯唔靠價錢靠補貼根本上係個市場度生存唔到。品牌係創造市場吸引目標客群，脫離咗品牌只會形成「買賣」變成倚賴同埋追逐市場。 所以自從淘寶，阿里巴巴，亞馬遜開始流行之後、呢一類型靠賺差價，打性價比或者快速仿冒嘅批發商，慢慢隨着時代落幕，因為佢哋當日最成功嘅賺錢方法就係賺資訊差，同埋物流差。 香港 時裝