我鄉下係客家，一到大時大節嫲嫲都一定會整炆豬肉。 細個時唔識欣賞，十幾歲時又怕肥，但人越大就越中意食，淨係中意食嫲嫲炆嘅豬肉。佢係一味其貌不揚嘅餸菜，兜深啡色嘅肥豬肉，除咗肉，都係肉。 中學時我住喺爺爺嫲嫲屋企。大學時搬咗返近學校嘅地方，越嚟越少返嫲嫲度食飯。但係過時過節我都會返去食佢依味炆豬肉。 有一次同佢傾偈，隨口問佢點煮，其實只係一味好簡單嘅家常餸。 好記得每次我賣口乖讚佢嘅豬肉好好味，佢都會好開心咁笑，叫我食多啲。 自從佢離開咗，已經食唔返嫲嫲嘅味道。就算媽咪幫佢煮大鑊飯煮咗咁多年，都整唔到佢嘅味道，始終爭少少。 早幾日得閒啲，想憑我嘅記憶，自己試吓整。一邊整一邊好努力諗返果個味道果個質感。雖然冇可能100%一樣，但能夠自己一手一腳去複製嫲嫲嘅味道，我覺得自己係成功。果個係我最愛嘅味道。