22.1 當我哋每日吸收好多好多影音資訊，但我哋到底有冇諗過，其實自己吸收緊嘅係啲咩呢？ 我每日偷窺嘅私生活雖然有六個單位，但係對我嚟講，呢啲日常生活都只不過係我茶餘飯後嘅娛樂，我從來都無好認真去思考呢啲嘢對我嘅意義。 謝安琪都有唱，「愛思索便會福薄」，簡簡單單睇下嘢咪好囉。 直到剛才，當新租客強迫我去思考嘅時候，我先真正檢視翻到底自己睇過啲乜嘢。 然後，我逐漸發現到一件好重要嘅事。 係新租客同佢老婆嘅關係。 我監視咗佢哋接近兩星期，其實除咗睇樓嘅時候互相稱呼為「老公同老婆」之外，佢哋兩個係完全無任何似一對夫妻嘅地方。 然後，新租客同佢老婆基本上碰面都只會喺新屋做家務，而且雙方都係各有各做。 望上去，我最初只係覺得一切正常，但而家諗深一層， 一對新婚夫婦真係會各自喺唔同房間打掃、各有各做而完全無交流咩？ 然後，係頭先嘅情況。 當我拎出保安棍打算攻擊新租客老婆嘅時候，出手保護佢嘅居然係18D男租客。 如果眼見自己老婆受到攻擊，出手嘅唔係應該係新租客咩？ 細心思考種種因素之後，我得出咗一個結論。 我望向新租客同佢老婆講：「你兩個根本就唔係夫婦關係。」 (1/3) 留言區繼續⋯⋯