講真，寫code越耐，會越覺得自己唔識寫code 上次提到自己寫咗28年，收到唔少朋友留言，多謝先🫡 但好老實，我由細到大都唔係咩特別叻嘅人，當初接觸寫code，純粹係因為想改Game (96年嘅金庸群俠傳) 我亦無讀過任何電腦課程，中三果年數學考試甚至捧蛋 ，雖然話Maths同code係兩樣嘢，但有時啲運算、演算，有數學底係好好多嘅 果年又咁啱，教Maths個阿sir自己有開電腦舖，拎0分嘅懲罰就係暑假去佢舖頭幫手，但後來我發現，其實佢係接咗間卡拉OK嘅生意，要搵人幫手打中文歌單 (當年我自學倚天比佢發現咗) 就係咁，喺佢舖頭打字之餘又裝d game玩下，當然又改吓game，漸漸就覺得寫code幾好玩 跟住就開始自學，但果陣未有得上網，無咁多資源可以參考，只能夠買書睇，黃金無嘅就託台灣「筆友」幫手搵，買完寄過嚟 但好多時睇完、學完、寫完，都唔知自己到底寫緊咩 即使到今日，自己日日對住啲code，但每次睇返寫過嘅，都覺得仲可以再寫好啲 所以點解我話寫code係一條不歸路 日唞寫、半夜寫，有時連去旅行坐緊飛機都寫 (註：自己開咗公司，而家係nomad嚟)