湊熱鬧，人睇我又睇。 今日終於去咗睇 破地獄。 之前擔心可能會用好多紙巾，結果最後只係响大哥同個妹嘅一句說話度有少少動容。 可能之前網上有太多戲透同分析，又或者戲情走向太明顯，搞到好多時都估到之後會點咁。 總括嚟講都值得去戲院睇嘅。 同朋友傾返，至知成套戲都帶出好多訊息：後生嘅同老一輩師父嘅價值觀、性別歧視（質疑女救護員能力同傳統喃嚒師父傳男唔傳女）、照顧（長期病患）長者嘅難處、唔同人對同一件事（如破地獄）嘅意義…… 整套戲我睇得唔太投入，正如之前所講，劇本走向太明顯，好多時都已經估到個劇情嘅方向（如個妹怪老豆偏心重男輕女，大佬就怪老豆唔畀佢讀書係都要佢跟老豆做喃嚒佬，而呀妹想讀乜都支持）。 而嗰句 “女人有月經，污糟，祖師爺唔鍾意㗎” ，其實之前有其他人都探討過，據說可能係基於以前醫學無咁昌明，又唔係人人都可以豐衣足食，咁某啲女仕在月事期間可能身體不適，而當佢哋參加祭祀時，畀人見到又暈又唔舒服咁就覺得係祖先唔想見到有月事嘅女性而懲罰佢哋，久而久之就傳出女性不宜參與祭祀咁。