自從生咗BB後，成日諗當年爸媽湊我時係點嘅呢，我估佢地應該都好辛苦，父母由內地去香港，之後結婚生我出來，無四大長老支援，而且佢地當時好窮無咩錢，租住板間房，要同其他租客share廚廁，無冷氣，舊樓無電梯，咁嘅環境下要湊BB真係唔容易，BB半夜喊點沖奶，嘔奶尿濕一日換幾套衫，點樣洗衫晾衫，我當年應該搞到爸媽好頭痛吧。 我記得阿爸曾經講過，佢地決定去香港生活，係想我在香港出世接受教育，我好感激佢地這個決定。 估唔到幾十年後，我做著一樣的事，同老公移民來到英國，生咗BB，原因當然係希望下一代在好嘅環境長大。 當年爸媽湊我時，應該無諗過我大個咗會去咗英國生活。同樣，我望住我阿囡，都唔知佢將來生活係點，希望佢健康成長，所有事都順順利利。 我對爸媽很愧疚，佢地養大我唔容易，而我現在卻離開佢地身邊。