幾年前我決定搞自己個人 Channel，無可否認當時生活係有啲拮據，咁啱見到有朋友公司請推廣員，雖然我知錢唔多，但可以有自由時間畀我去做 Channel，所以我就去做。 有次一位觀眾喺街上面遇到工作中嘅我，好有心咁同我講，不如佢喺佢公司開個長工職位比我做啦，以我嘅資歷唔需要做「呢啲」（我明白呢位朋友係指我有能力做一份更輕鬆但搵到更多錢嘅工作，並唔係歧視果份職業） 。我當時的確非常感激呢位朋友，但因為我仍然好希望可以繼續做返我嘅 Channel，而一份長工好可能就唔容許我咁做，所以我最後都冇答應該位朋友嘅邀請。 呢兩日見到一啲報導，指一直為演藝事業努力嘅戴耀明先生為生活而去一間餐廳做清潔工作，令我諗返起當時嘅我，為咗自己鍾意但搵唔到錢嘅事，而另外做一份唔感興趣嘅工作，重點係果種心甘情願，辛苦但同時又好開心嘅心情，我相信一啲開口埋口都同你講錢錢錢嘅人係永遠都唔會明白。