落車幫忙，結果出人意料 1/2 諸事八卦嘅我，喺路面見到有車跪低，通常都會落車問下有冇事要幫忙，例如搵拖車、喺後面擺陣等人見到、或者危險情況下報警等。如果壞車嘅係自己任職嘅品牌，可以做嘅嘢就更加多了。 嗰陣我喺一間出晒名波箱易壞嘅德國品牌工作，有一個秋天嘅星期日晚，工作完畢，揸車經過西貢一條鄉村嘅大斜路，居然見到一班人喺度推緊一架敝品牌嘅私家車 觀察到呢架車頭尾燈都有開著，引擎應該運作正常，但係架車行唔到要用人手推，估計都應該係波箱損壞喇…咁喺大斜路，推車係好危險嘅事，咁我就喺後面停車，行上去問下乜事 果然，架車傳動出現問題，差唔多返到屋企之際，錶板閃動稱為「死亡閃燈」嘅波箱警告燈，停在路中心，車主連同一眾乘客都不知所措，唯有推車埋一邊，呢個時候我就出現了 我先幫車主將車安全停好，包括入P波、拉緊手掣，同埋將軚盤轉向路邊，打電話俾敝公司專用嘅拖車公司聯絡，安排好所有事情，就檢查下架車。當時我品牌嘅汽車波箱保用，係60個月/100000公里，一睇架車里數，咦！係98xxxkm？再睇埋行車證，咦咦！出車4年多，未夠5年？立即同車主講，如果各樣條件吻合嘅話，架車嘅保用係仍然生效…