落車幫忙，結果出人意料 2/2 幾個月後某日，我突然間收到一個陌生電話，原來係當日西貢嘅車主，喺維修中心攞我電話再打俾我，目的除咗向我道謝之外，覺得都差唔多係時候要換，專程打嚟搵我傾下生意咁話。 結果，一張新車合約好順利咁簽成，有趣嘅係，車主先生買嘅新車型，係同原本嗰架同型號、同引擎，連馬力都係一樣，我相信應該都真心係返嚟捧場嘅，而呢宗買賣生意，最後為我帶嚟一份令人好舒適嘅收入。 註： 經歷過多年，呢個品牌嘅車款，我接連擁有一架跟一架，發現原來呢一款波箱，只需要用適當嘅腳法，除咗傳動效率高、加速感實在、慳油之餘，其實並唔係咁易壞。好似事件嘅車輛，都用咗四年幾同差唔多十萬公里，其實唔算特別唔襟用。