維他奶(345)因為幾年前嘅殺警事件，造成關公災難，俾中港兩地杯葛消費，業績斷崖式下跌，由之前每年賺開5,6億，攪到2022財年要蝕過億，股價亦由最高47蚊跌到最低唔夠5蚊。呢兩年業績叫做開始pick up返，但上年都係賺1億左右，距離風光年代仲係好遠。 就喺維他奶最霉嘅時候，信和主席細佬黃志達透過旗下公司楊協成及其家族辦公室喺市場上密密吸納，目前已經持有維他奶股權12.26%，隨時可以要求開股東特別大會，重選董事會。 呢一刻仍然唔知黃志達賣咩葫蘆，但維他主席羅友禮尋日就話唔知佢想點！咁即係話黃志達嘅增時係無同維他董事會打過招呼，咁就顯得非常敵意啦。 斷估黃志達都唔會純粹因為見維他業績pick up，諗住安安份份做個財務投資者，分享維他成果？肯肯定另有所謀。 睇返資料，維他股權相當分散，羅氏家族持股加埋都唔夠30%，如果黃志達繼續喺市場增持，去到咁上下，好可能會提敵意收購，向全體股東提出cash offer，收購股份直至去到控股水平。 維他奶