第三回 - 哀歌 柏林馬拉松之後，我有一個大膽嘅諗法。就係一年內完成剩餘四大馬。倫敦，芝加哥同紐約我都係可以達標參賽。東京就用慈善名額申請。除左紐約未開始報名，其餘都已經安排好。 可惜，對於我人生最大既打擊就係依段時間發生。我同前妻當時因為性格不合而離婚。佢係我一路以嚟最大嘅支持者。即使係非常任性既追夢佢都一路支持。每個比賽都會係終點度接我。亦都一直安撫我係跑步路上不安嘅心。 突如其來嘅衝擊唔單止對我跑步帶黎轉變，亦都為我既人生帶來改變。真正嘅心碎會帶你去到深淵，過去再有興趣嘅事你都冇力再做。討厭同所有人相處，同時又渴望有人黎慰問。世界係當時已經完結，生命都危立係崖邊。又或者真正嘅我已經死去。 之前提過跑步習慣拯救左我生命。當時，我咩都唔想做，惟獨係跑步依個習慣，就好似呼吸一樣。我依然照跑。開頭只可以跑三公里，慢慢都跑番上十五六公里。再冇任何訓練目標，只有跑步就好，不安嘅情緒就只有跑步可以撫平。係英國無親無故甚至朋友都冇嘅我，唔再去任何跑會活動，拒絕多餘社交。世界好似得番跑步同剩餘無幾會接觸嘅人。三月嘅東京馬拉松都只好申請延期。 Comment續 RunningThreads