我在香港IVF體驗 （1） 話說本人而家正接受台灣IVF，未進入植入嘅階段。不過就想分享我兩年前係香港做IVF嘅體驗。 年紀都唔細，婚後一年小產過一次後，就再無動靜，於是開始考慮做IVF。正如上次分享，身邊有朋友做過IVF，佢好推薦去台灣，可惜當時撞正疫情封關，都唔知要等到幾時先飛得，唯有係香港瑪麗試一次。 瑪麗嘅IVF有分公家&私家兩條隊，基於我同丈夫都過咗39歲，所以就可以排私家隊。聽聞公家隊會排幾個月，私家隊當時我哋等咗兩個月就已經有得進行程序。 最深刻就係見醫生咨詢嘅時候，我哋兩公婆一張白紙咩都唔識，係咁問嘢問咗成粒鐘😅 醫生好有耐性去解答。不過感覺到香港嘅醫生比較保守穩陣為主（日後去咗台灣做IVF就更加覺得係） 佢哋用緊嘅藥同埋方法，都係要好多研究同睇好耐數據，覺得好信得過先會採用。難怪有人會話香港嘅IVF較落後，但我個人覺得唔同嘅醫療取態，適合唔同嘅人，況且我都聽唔少成功個案喺係香港IVF發生，所以如果正在考慮要唔要係香港做IVF嘅妳，都要權衡一下你buy唔buy香港呢套。 下次分享埋取卵過程！雖然而家成日都當笑話分享俾朋友知，但其實個陣真係好震撼吓！