點解我唔鍾意睇電影？ 是咁的，前幾日收工去咗139食飯，大信開咗套National Geographic拍嘅記錄片《Free Solo》嚟睇。呢套片係講述一個視攀石為命嘅男人——Alex Honnold，佢喺2017年6月徒手登上優勝美地國家公園3000英尺高嘅酋長岩，全程無繩索、無安全裝備，耗時3小時56分完成呢個前無古人嘅壯舉。片中記錄咗佢點樣喺逐夢過程中面對家庭、愛情同友誼等人際關係 睇完之後，我開始諗，點解我一直都偏愛記錄片，而唔係電影。記錄片俾我嘅感覺係，佢呈現出嚟嘅嘢，大部分都係真實嘅、唔經過修飾嘅，帶嚟嘅係真情流露，而唔係靠演技。Alex攀岩前一晚，拍攝隊伍嘅焦慮同擔心，嗰種真誠嘅情感，係電影難以複製嘅。佢哋知道呢個挑戰有幾危險，一旦失誤就會無命返嚟。嗰份擔憂係無法假裝出嚟嘅。 記錄片係教育同觸動我嘅一種媒介，將赤裸裸嘅現實直接擺喺你眼前。而電影，雖然都會呈現人性，但始終係經過編劇、設計過嘅創作世界。當然，電影可以喺視覺同故事上帶嚟衝擊，但總覺得多咗一層隔膜，係將現實抽離，再投射出嚟。對我嚟講，記錄片無需太多花巧，直接展示最真實嘅一面，呢種真實先係真正教育我嘅力量。