我年代的宿敵 （快圖美 vs 金獅影視 ） 當年除咗哥哥同校長之爭，一級方程式有冼拿同保魯斯之爭，意大利甲組足球聯賽祖雲達斯同AC米蘭之爭，其實我最記得嘅反而係呢兩間租電影VHS影帶舖頭嘅競爭，我去開跑馬地快圖美同黃金廣場金獅影視嘅，點解分兩間？因為當時佢哋好似卡拉OK黃金年代嘅獨家試唱咁樣，最新落畫電影會分別由呢兩間搶到獨家推出影帶，不過重點係呢兩間舖頭你都要識人，唔識人留新戲租俾你你就幾大支嘢都冇用。 咁所有新戲呢都係今日租聽日一定要還帶，所以如果套戲你覺得好好睇，你會喺有限時間內不停返睇，最記得有套戲叫「醜小鴨」，係由曾志偉同恬忸演出嘅，睇第一次覺得好好笑之後喺嗰個星期六日不停返睇咗六七次，不過而家對入邊嘅劇情完全失曬憶喇。唔知邊年開始出現咗Dup帶機，咁就基本上套套戲都Dup定先，比自己慢慢翻睇，或者要借俾老豆阿媽啲朋友睇，到最後開始租Laser Disc已經係後話。 （到租Laser Disc年代，當年細個係會搶住去架碟機嗰度翻碟去side B)