發夢，真係一樣幾好嘅嘢 話說最近小兒出世，基本上我成個生活習慣都有翻天覆地嘅變化，亦好合理地每晚都係攰到七彩一達落床就瞓(如果衰仔唔扭計嘅話🤡)⋯ 而有一晚突然發夢夢到已經過咗身幾年嘅婆婆(我阿婆由細湊到我大，好錫我)，響夢入面佢開咗間寵物店，而我就行咗入舖頭搵佢。當我一見到佢，即刻好多野同佢講，我話比佢知我個仔出咗世,我最近過得點,我有幾掛住佢，不過佢一律冇答我，只係一路微笑點點頭，而唔知點解我亦開始喊，喊下喊下就醒咗⋯ 唔知係唔係因為我太想話比阿婆知我做咗老豆，依個夢可以話係完成左我一件好想做到嘅事。而我依家再貪心啲，希望婆婆真係響嗰邊開左間寵物店，到有一日我都去嗰邊嘅時候可以去幫下手，可以再搵佢傾吓計。我到依家都仲記得，婆婆個笑容真係好溫暖⋯ 所以話，發夢，真係一樣幾好嘅嘢