續(1) 整個六月過去，練習太難，持續唔到。10+10都只係完成十公里加十公里。每日十八公里可能太多，間歇跑增益唔多，回復時間長同容易受傷。所以七月後轉換課表，每日改為十六公里，繼續10+10 練習，另加每星期二十五至三十公里 long steady run (四分至四分十秒步速)。成效非常。十月係半馬拉松tune up race跑到七十五分台。此時此刻，我相信我絕對比一年前嘅自己快。 磨拳擦掌後，嚟到紐約嘅賽道，一樣需要搭巴士到起點，一樣係朝早得兩三度，一樣係戶外食三四個鐘風。所有野echo住波士頓嘅起點。最後一場啦！集合我嘅熱血，動力，悲哀，信念以及壓力，焠鍊出更純粹更強大嘅自己。今場我係嚟再突破自己，其他野唔再重要。無需要再理會戰術，一直向PB時間邁進。

續(2) 一起步就係兩公里上斜，我用盡全力去追住PB跑。比任何一場都辛苦，五公里過後，已經出現疲態。依然保持住目標步速，紐約就算唔上落橋都依然係rolling 斜坡路，依個Final Boss 絕對令人感到絕望。半程時間1小時19分31秒。PB唔到啦，不過唔緊要，並冇垂頭喪氣，我要繼續保持步速。從頭到尾我就帶著依份任性，依一刻心入面諗起激戰賤輝嘅一句「我仲有嘢輸咩？唔緊要啦！贏又好輸又好，啲嘢都返唔到嚟！」咬住牙關keep多一米就多一米。 直至三十公里左右，對腳已經痛到保持唔到。尾十公里完全失去節奏。以前同樣情況一定怪東怪西，千錯萬錯都唔係自己嘅錯。不過今日場地氣溫同我自己嘅身體狀況都好好，顯然係自己未夠強大！我覺得咁樣好爽，我返英國要再努力啲。我想再練多啲，練快啲。To what do I choose to bind! 衝線時間2小時44分49秒。估唔到連完成時間都echo波士頓馬拉松。拎過冬甩獎牌，本身以為會好激動，不過心情異常平靜。本身以為會好失落，不過好似失去左感覺。三年嘅夢淡淡然完結。

續(3) 真實嘅世界結果往往係遺憾，或者如此。但準備紐約嘅依一次我係奮不顧身咁去操，所有野令我睇到真正嘅「道路」。真正絢爛嘅唔係美侖美奐嘅獎牌，亦唔係放上社交平台得到嘅優越感。真正扣人心弦嘅係不斷重覆而不繼追求嘅進步，依樣嘢賦予跑步嘅意義，亦同時找尋到生命意義。完左啦。不其然諗，之後嘅生命應該點樣延續？