今日無端端聽返《遙遠的Paradise》，覺得佢好適合今時今日嘅生活狀態。唔知有冇人同我一樣，係鍾意Beyond三子時期多啲。雖然我都好鍾意家駒，但總覺得家駒嘅音樂同歌詞更多係講「我哋」而唔係「我」，裏面有一種強烈嘅沉重感，有時甚至有啲理想化同浪漫主義。 就好似聽住《灰色軌跡》個畫面就係揸電單車要炒，《海闊天空》則唔應該出現喺香港公眾場合，因為太過沉重，令日常生活中好難有共鳴😅。 反而喺三子時期，Beyond嘅作品更傾向於表達個人內心嘅情感同掙扎。相比起家駒時期嘅理想主義同社會批判，呢段時期嘅音樂作品更貼近於個人化同多元化。呢段時間嘅作品亦顯示咗喺旋律同編曲上嘅創新。對於當時嘅我嚟講，呢啲音樂就好似有個朋友喺側邊同我傾偈，一齊搵緊新嘅道路，共同成長。 聽住呢啲音樂、咀嚼裏面嘅歌詞，令人感到親切同共鳴。由《遙遠的Paradise》入邊嘅痛苦同憤世，走到《驚喜》同《霧》入邊嘅頹廢惘然，最後大徹大悟走到《十八》同《不見不散》。 香港