上一篇講到一位我至今都未能忘懷嘅小戰士之後 一直都唔知點樣繼續寫落去。 失去親人甚至係骨肉， 都一定係錐心之痛 希望BB係天上會做一個快樂的小天使 Ready 嘅時候再嚟人世間睇下天下萬物。 故事講到我囡囡去到7個月大嘅時候 醫生竟然提早俾佢做切除多餘腎臟嘅手術， 本身要去到一歲先俾佢做 （當時我仲擔心點樣可以孭住個尿袋學爬，怕佢發展遲緩） 好彩囡囡乖乖地飲奶 生長線發展得幾好 所以醫生就網開一面， 俾佢提早做手術。 做手術當日有一位家長可以陪小朋友一齊入手術室，並且接受麻醉 作為一個見到佢打針都會喊嘅媽媽 我覺得我自己嘅心臟未強大到可以入手術室 所以就派咗爸爸入去 去到做完手術出返嚟 又係可以派一位家長入去等佢 呢個時候我就自告奮勇去迎接我個叻叻BB離開手術室 等緊嘅時候 突然間有個姑娘叫我個Nickname 呢個名係我中學嘅時候先用到 擰轉頭一望 發現竟然係我中學同學 呢個世界緣份就係咁奇妙 我個中學同學竟然係有份參與我女嘅手術 佢呢個時候拍拍我膊頭 同我講：放心啦，手術好成功 去到呢一刻，我先可以放下心頭大石 珍惜現在擁有的