秋天才公映破．地獄，睇完特別emo……計計吓，由9月開始準備梗個心態去睇呢套戲，知道11月9號公映，3號已經特登買定飛，好有儀式感咁去迎接呢套戲。 曾經話過，ready 好就分享一啲關於離別的事： 我爸喺5個月前畢業了，留低我哋喺度繼續進修，又或者係叫做「修煉」。睇破地獄呢套戲，簡直係將5個月前嘅嘢再經歷一次 ：病人失去自理能力，有心願想完成，譬如爸無胃口咗好耐，但有一次好想食一舊炸豬手，無力咬嘢食，細細嚿豬手都要剪碎俾佢食；仲記得5月母親節，係最後一次齊人去食buffet，在紅磡；無幾耐，爸腳痛到不得了，要連夜call白車入院，之後留院嗰幾日，醫生講明係last call，陸續叫啲親友嚟最後探望，每一日我都好驚收到醫院call。最尾嗰一晚，我同爸鳩嗡話想買樓，佢話好呀，計掂條數就得啦，我話：到時接埋你一齊出嚟住；佢話：我走唔到㗎喇，你哋住啦，我出唔到去㗎喇。喺唔知點應嘅情況下，探病時間都夠喇，「好啦咁聽日再嚟送飯俾你食啦」；爸話：得啦早啲返去唞啦，你個樣好攰呀。