誠03 佢升上中學無耐，好突然咁同我「表白」。 就喺我生日嘅前一日，阿誠話呢排成日瞓唔著。 原因係「我好似有少少鐘意咗你…」 throw back嗰時呢句都算係潮語（唔知仲有冇人記得萬寧妹妹），所以當時暗爽咗一下後，又覺得自己唔應該當真。 唔記得自己覆咗咩，但總之我選擇咗迴避。 而呢句「少少鐘意」，好快就比佢洗版式嘅生日快樂洗走咗。 我哋又回復平時嘅對話。 臨近聖誕，學校會搞Christmas Party。 好多人出post問有無人想收聖誕卡，我都唔例外。 阿誠話佢又想收聖誕卡。 「你畢咗業 咁我點比你啊～」 「個日我會同佢哋返嚟，你到時比我咪得」 知道佢party嗰日會返嚟之後我勁緊張，即刻去咗買疊聖誕卡，揀張最精緻嘅寫比佢。 當日仲專登襯咗套靚嘅衫，好開心咁返學校。 Party中段我喺走廊嘅窗口望到阿彤，佢示意我出去。 「你係咪有嘢要比人啊！」佢笑得勁奸，我即刻明佢意思，好尷尬咁返入去拎張卡。 我交張卡比佢，再望吓周圍，見唔到阿誠。 「唔洗望啦，佢唔敢上嚟，叫我幫佢拎」阿彤有啲唔耐煩拎完張卡就走咗。 我無返入課室，企咗喺走廊目送阿彤，直到佢落到操場，將張卡交咗比一個人。