以前睇開村上春樹作品，佢好常用好立體嘅方式去寫一個角色，例如一個殺手都有對家人/動物有感人溫情嘅一面，一個見義勇為嘅人長期有性沉溺變態行為等等。 從此就用呢種思維去睇人同事物，亦包括睇電影。 今次睇 《破地獄》都唔例外。 文玥——無疑係一個孝順女，但喺文哥心目中點做都有唔滿意嘅地方。但如果喺醫生太太角度去睇，係典型嘅小三，唔會理背後咩原因，妳都係個拆散人家庭嘅死八婆。但佢喺救護員工作每次都視生命好寶貴盡全力去拯救，被拯救嘅家屬直頭會當佢係聖母。 道生——曾經好多員工嘅一個老闆，被遣散嘅一定當佢係仆街，後來得返三個員工共同進退，可能喺呢三個員工心目中佢會係一個好老闆。但喺女朋友心目中一定唔係個合格嘅男朋友，做嘢做到賣咗層樓，五十歲人都冇比一個承諾/屋企女朋友，女朋友嘅角度就一定係覺得唔負責任。但係佢喺文玥一家所做嘅，文哥永遠都會記得，文玥都係，有佢嘅介入調和咗一個家嘅復和。 哥哥志斌——阿爸同阿妹嘅角度睇移民一走了之，一定係個好自私嘅人，但其實某程度上佢喺「自己嘅家」好努力，為老婆仔女，點計都係個好爸爸！從來唔想做破地獄，書又讀唔多，「為自己頭家」埋葬自己青春喺破地獄上面⋯⋯