一套戲票房好唔一定代表好好睇 同樣一套戲票房一般亦唔代表唔好睇 所以有人話《破地獄》唔好睇，我覺得好正常。睇戲從來都係主觀，冇感動冇流眼淚唔等於嗰個人活得好幸福，事情冇必然關連性，相反套戲可能只係有一小個片段觸動到你，就已經令你足夠覺得呢套戲好好。 有人話黃子華今次演出一般，某程度上我認同，但大家唔可以忽略一樣嘢，就係黃子華最近連續三套電影都大賣。我好記得細個睇佢棟篤笑，佢經常笑自己係票房毒藥，好多戲都唔收得，而大家都睇過黃子華嘅棟篤笑，老實講未必次次都咁好笑，但每次觀眾最大反應一定係講政治2003年《無炭用》笑董建華嗰一段係經典，2014年講咗幾句佔中，都係全場觀眾最有反應嘅位，佢嘅棟篤笑某程度上幫香港人發洩，等大家喺日常生活中可以唞吓氣，所以一講政治，觀眾自然最有反應。正如黃子華自己所講，今時今日好難再做棟篤笑，但係有冇其他方法俾觀眾發洩吓？黃子華最近三部電影都好似係香港人縮影， 《飯戲攻心》講移民及家庭 《毒舌大狀》講公義 《破地獄》講家人及心結 三套戲所講嘅都同香港人好息息相關，既有發洩，亦有勸勉，一如黃子華以往嘅棟篤笑一樣，比大家一個盡情發放嘅空間。