有時啲嘢似係整定。 就例如睇《破地獄》嗰日，我咁啱係度整理今年收嘅幾百個referral，不經不覺已經走左一半病人，當中包括我提過嘅風球先生、魚肉腸婆婆、前夫伯伯。 又例如我入行前，以為我嚮往嘅係最baba聲嘅急症病房，點會諗到後來做紓緩治療（PC），由下下諗住點樣改變同教人，到後來自己被病人教識、改變嘅反而多得多。 又例如我做學生時第一次入病房見臨終病人，我緊張地問老細陣間應該點lead，點知佢拍拍我話，「唔駛lead，我地follow就得」。 佢講嘅唔止係follow 病人所想，亦係講緊生命嘅軌跡、限制。 嗰時我以為自己都會好快變得好似老細咁從容，事實係直到依家，即使面對過幾多離別，有好幾個病人走時，我都靜靜地自己喺辦公室流眼淚。 中國人咒人最惡毒嗰句叫做「不得好死」。 喺促成「好死」嘅各樣天時地利人和之中，大把野唔駛或唔到我做，我以前一度懷疑我做嘅嘢會唔會太少、太有限。但講到直面生離死別嘅痛苦哀傷，當所有人都可以避嘅時候，我無得走，仲要接得住，hold得穩。睇完戲嘅我係度諗，呢個或許就係屬於我能夠做嘅超渡生人、扶到站嘅人落車嘅一種喃嘸法事掛。🫶🏻 臨床心理學家 工作日常