早幾日終於有時間去睇《爸爸》 其實感覺有少少特別，我唔係好識形容佢係一部咩類型嘅電影： 係探討件兇案點解發生？唔係 係研究精神病患者情況？唔係 係討論屋企人關係好壞？唔係 係講述學校教育有問題？唔係 觀眾就好似一個旁觀者，跟住劉青雲嘅角度去睇成件事，但旁觀沒有者清，到最後其實都係唔會知發生咩事。當然呢套戲唔係要搵理由，觀眾只係喺主角角度去感受，但呢個就係我投入唔到嘅原因。 可能我個人比較偏激，如果我係主角，我無可能會原諒個仔做呢件事，所以一路睇我充滿疑惑，唔明點解成套戲無一個人會怪個仔殺自己媽媽同妹妹，姑媽仲要擔心佢喺喪禮上面受壓力，阿叔又會問佢喺邊度考DSE，當時兩母女屍骨未寒，我睇到黑人問號。我知佢係有病，但無咗兩個最愛嘅人亦係事實，我難以理解點解主角會選擇原諒，你比我真係會憎佢一世。 至於劉青雲嘅演技當然無容置疑，一貫嘅高水準，如果佢最後問鼎影帝亦好合理，但如果話係佢從影生涯最好，我又未必太認同，《神探》嘅陳桂彬、《奪命金》嘅三腳豹同埋《嚦咕嚦咕新年財》嘅青雲先係我心目中嘅最好。 戲入面話劉青雲似Mr Bean，大家可以睇返《喜馬拉雅星》，佢就係做緊Mr Bean。