手語譯者月經之炒散嘅(唔)好處——首先，收入係其中一個大問題——如果接唔到一啲穩定嘅工作，會出現今個月唔夠錢開飯嘅問題，咁多年嚟都會勸啲新人儲定多啲錢先好考慮全職炒散。如果本身有其他工作技能，一律建議做斜桿族，對收入有一定幫助 病假？係冇嘅——筆者係自行買咗保險，之前要入院之後抖足個幾月，都係靠保險俾晒啲醫療住院開支。休息嗰個幾月係完全冇收入嘅，都係燒儲蓄。傷風感冒小病嗰啲就好靠搵唔搵到人替工（出外靠朋友極重要！）替工代咗開工即係都冇病假收入嘅 福利——冇 時間——自由自在，安排到就返工、放假、量地 交友——因為工作時間唔穩定，要好好同返朝九晚五嘅朋友聯繫呢，係有難度嘅。而家已經唔會有朋友約我星期六日去街👉👈識新朋友都相對難啲深交，主因係好少喺一個固定地點長期工作 養貓——係（對於我個人嚟講貓係好重要嘅！！！），交晒俾屋企老人家幫手照顧，而我亦發現老人家對啲貓孫好過我🥺因為成日都唔穩定時間工作，啲貓都習慣咗我一喺屋企就會每隔兩小時一次零食放題 家人——盡量陪到就陪，咁多年嚟佢哋都慣咗我一係好唔得閒，一係就太得閒喺屋企hea😌大病抖緊嗰個月，老人家佢以為我只係冇工開😳