我係九龍醫院嘅9D住咗一個月,之後係8E 住咗一個禮拜 (我一開始冇寫日記,係我個專責護士叫我寫) Day 1 我17號夜晚11點幾由伊利沙伯醫院轉院去九龍醫院,三個救護員去到我面前,抬我上擔架,上到救護車,我開始喊,其中一個救護員叫我唔好喊。 去到九龍醫院已經係18號凌晨(好彩係凌晨到,個陣大家已經訓咗,因為之後我係房係會睇到被收症嘅人)。一個姐姐同一個姑娘係度等我,姐姐帶我入房仔。我即刻熄咗電話。姐姐幫我度血壓、檢查傷痕。檢查完傷痕,姐姐本身話要綁四肢（綁手我本身可以,因為係伊利沙伯醫院個幾日都有綁手),結果剩係綁手,並冇綁腳(姐姐話我腳背有傷口),姐姐見到我手上D傷口,佢同我講朝早先洗傷口。我訓咗上張床,姐姐綁我腰同手。佢哋走咗之後,我好快就掙脫咗右手嘅手帶。我好快就訓咗。好快就到咗朝早6點,有個高高瘦瘦嘅姑娘入咗嚟,佢話佢係我嘅專責姑娘,佢見我右手嘅手帶掙脫咗,佢綁返我,同埋叫我唔好掙脫。佢就走咗,7點佢又入返嚟,係食早餐嘅時間,好彩九龍醫院D粥係好食,但係佢餵咗我幾啖之後我就話唔想食,結果佢夾硬差唔多餵哂。