香港人講 澳洲牛奶公司 ，會唔會被人反白眼？😆 由細食到大，講真一次都未試過被不禮貌對待🤷🏻‍♀️ 覺得以前班侍應哥哥搞笑啲，印象深刻的有幾次： 1） 我和同事去，講開另一位同事放假後的工作沒有人跟進，點知侍應哥哥們一齊搭咀：「係囉，xx真係唔應該放假！」、「咪係，放咗假啲嘢邊個跟啊？」 七嘴八舌，大家笑成一團🤣 2） 一個人去，食完個正餐例牌叫碗熱燉奶，侍應哥哥擺低碗嘢之後：「好似你咁又白又滑嘅燉奶！」 受寵若驚，忍唔住偷笑，同枱三位唔相識的小姐一齊偷笑😆 3) 懷孕時一個人去，侍應哥哥大叫：「1.5位入緊嚟，俾個卡位佢坐得舒服啲！」 港式人情味就係呢啲 🥰 食物都係嗰啲啦，我嘅all time comfort food，隱藏食法: 叉燒可以轉牛肉，炒蛋多士可以轉蛋治，奶茶香滑，西多士出色，熱燉奶係我嘅最愛🩷 唔知大家有冇澳牛奇遇呢？